Шығыс Қазақстан облысының Алтай қаласында «Табиғат тазалығы — ел болашағы» атты дөңгелек үстел өтті. Шараның басты мақсаты — ұлттық «Таза Қазақстан» жобасы аясында жастардың экологиялық мәдениетін қалыптастырып, қоршаған ортаға жанашырлық пен жауапкершілік сезімін арттыру, деп хабарлайды Altainews.kz тілшісі. 

Алтай қаласының Жастар ресурстық орталығы ұйымдастырған кездесуге білім беру мекемелерінің өкілдері, мемлекеттік органдар, қоғамдық ұйымдар мен еріктілер қозғалысының мүшелері қатысты.

Басқосу барысында қатысушылар өңірдің өзекті экологиялық ахуалын талқылап, табиғатты қорғауға бағытталған жаңа идеялар мен бастамаларды ортаға салды.

Мемлекет басшысының тапсырмасымен жүзеге асырылып жатқан «Таза Қазақстан» ұлттық жобасы ел аумағындағы экологиялық жағдайды жақсартуға, тұрмыстық қалдықтарды басқару жүйесін жетілдіруге, жасыл экономика принциптерін енгізуге және халықтың табиғатқа ұқыпты қатынасын қалыптастыруға бағытталған. Осы мақсатта Алтай өңірінің жастары да өз үлестерін қосып келеді.

Кездесу барысында жастардың экологиялық белсенділігін арттыру, волонтерлік қозғалысты дамыту, мектеп пен жоғары оқу орындарында экологиялық білім мен тәрбие берудің тиімді жолдары талқыланды. Қатысушылар қоғамда экологиялық мәдениетті қалыптастыру тек бір саланың емес, тұтас елдің ортақ ісі екендігін атап өтті.

Дөңгелек үстелде Алтай өңірінің экологиялық мәселелерін шешу бойынша нақты ұсыныстар айтылды. Әсіресе қалдықтарды сұрыптау мәдениетін қалыптастыру, жасыл аймақтарды көбейту, ағаш отырғызу дәстүрін кеңейту және табиғатты қорғау бағытындағы ақпараттық-ағартушылық жұмыстарды күшейту қажеттігі атап өтілді.

Іс-шара аясында қатысушылар экологиялық мәдениетті қалыптастыруда әлеуметтік желілердің, медиа мен блогерлердің рөлін де сөз етті. Ақпараттық кеңістікте экологиялық тақырыптағы жобаларды көбейту, жастарды табиғатты қорғауға шақыратын бейнероликтер мен челлендждер ұйымдастыру туралы ұсыныстар айтылды.

Кездесу соңында қатысушылар символдық мәні бар «Жасыл болашаққа қадам» атты тұқым отырғызу акциясына қатысты. Бұл акция табиғатқа қамқорлық пен болашаққа деген сенімнің, жас ұрпақтың экологиялық жауапкершілігінің көрінісіне айналды.

Жастар ресурстық орталығының өкілдері мұндай бастамалар жүйелі түрде жалғасатынын, өңірдің барлық елді мекендерінде экологиялық мәдениетті дәріптеу бағытындағы іс-шаралар тұрақты түрде өткізілетінін айтты.

Күтілетін нәтиже ретінде жастардың экологиялық сауаттылығын арттыру, табиғатты қорғауға саналы көзқарас қалыптастыру, сондай-ақ білім беру ұйымдары, мемлекеттік құрылымдар мен қоғамдық бірлестіктер арасындағы ынтымақтастықты нығайту көзделіп отыр.

Ұйымдастырушылардың пікірінше, «Таза Қазақстан» жобасы ел азаматтарын ортақ мақсатқа біріктіріп, әр өңірде экологиялық мәдениетті жаңаша деңгейге көтереді. Осындай шаралар арқылы жастар қоғамның экологиялық дамуы мен жасыл болашағын қалыптастырудың қозғаушы күшіне айналмақ.