Биыл еліміздегі егістік алқаптарының жалпы көлемі 23,8 млн гектарды құрайды, бұл өткен жылмен салыстырғанда 180 мың гектарға артық. Бұл туралы вице-премьер – ұлттық экономика министрі Серік Жұманғариннің төрағалығымен өткен 2026 жылғы көктемгі дала жұмыстарына дайындық жөніндегі алғашқы жиналыста айтылды, деп хабарлайды Altainews.kz тілшісі ҚР Ауыл шаруашылығы министрлігінің баспасөз қызметіне сілтеме жасап.

Ауыл шаруашылығы вице-министрі Азат Сұлтановтың хабарлауынша, егісті әртараптандыру стратегиясы аясында дәнді дақылдар алқаптары азайып, 15,9 млн гектарға жетті. Бұл негізінен бидай егістігінің қысқаруына байланысты: биыл ол 12,1 млн гектарды құрайды, ал 2025 жылы 12,2 млн гектар болған еді.

Сол уақытта жоғары маржиналды және қайта өңдеуге сұранысқа ие дақылдардың егістік алқаптары ұлғайтылады. Мәселен, майлы дақылдар – 55,2 мың гектарға артып, 4,045 млн гектар; арпа – 93,8 мың гектарға (2,4 млн гектар); жүгері – 42,9 мың гектарға (217,5 мың гектар); мал азықтық дақылдар – 37,4 мың гектарға (3,1 млн гектар).

Серік Жұманғарин ауыл шаруашылығы, Су ресурстары және ирригация министрліктеріне ауыл шаруашылығы жерлерін тиімді пайдалану, заманауи суару және ирригация әдістерін қолдана отырып, егжей-тегжейлі жоспар әзірлеуді тапсырды.

Егіс науқанының негізгі құрамдастары – сапалы тұқым, минералды тыңайтқыштар және арзандатылған дизель отыны. Аграрлық несие корпорациясы фермерлерге жеңілдікпен несие беруді бастады: бүгінгі күнге дейін 1 694 өтінім келіп түсті, жалпы сомасы – 241 млрд теңге.

2026 жылғы көктемгі егіске қажетті 2,3 млн тонна тұқымның 1,5 млн тоннасы сараптамаға жеткізілді, алдын ала тексеруден 1,3 млн тоннадан 98,1%-ы кондициялық деп танылды. Минералды тыңайтқыштарды себу жоспары – 2,3 млн тонна.