«Қазгидромет» ШҚ филиалының дерегінше, 30 қыркүйекте облыстың солтүстігі мен шығысында жауын-шашын күтіледі. Түнде кей жерлерде қатты жаңбыр жауып, соңы қарға ұласуы мүмкін. Сондай-ақ, түнде және таңертең облыстың солтүстігінде тұман түседі.

Желдің бағыты батыстан, солтүстік-батыстан соғып, екпіні түнде облыстың солтүстік-батысында, күндіз батысында, солтүстігінде және оңтүстігінде 15–20 м/с жетеді.
Мамандар тұрғындарды абай болуға шақырады:
жүргізушілер жылдамдықты азайтып, жолда сақ болғаны жөн;
жаяу жүргіншілер жарақат алу қаупін төмендету үшін қауіпсіздік шараларын сақтауы қажет;
қатты жел кезінде ескі және жалғыз тұрған ағаштардан алыс жүрген дұрыс, сондай-ақ олардың жанына көлік қою қауіпті;
электр сымдары мен шайқалып тұрған заттарға жақындамау қажет.
Төтенше жағдайлар кезінде 112 нөміріне қоңырау шалуға болады.
Дауылды ескертулер туралы ақпаратты «Дәрмен» мобильді қосымшасынан алуға болады.