Ауылдағы мал дәрігерлерінің жалақысы артады
Келер жылы ауылдағы ветеринардың жалақысы 400 мың теңгеден асады. Бұл туралы Ауыл шаруашылығы вице-министрі Аманғали Бердалин мәлімдеді, деп хабарлайды Altainews.kz тілшісі.
Оның айтуынша, Республикалық бюджет комиссиясы ветеринария мамандарының жалақысын көтеру үшін 22 млрд теңге көлемінде қаржыландыруды қолдаған.
– Биыл ветеринарияға қатысты заң жобасын Парламент Мәжілісіне енгізуіміз керек. Онда тиісті өзгерістер қамтылады. Жалпы, Республикалық бюджеттен 22 млрд теңгеге қолдау алдық. Сондықтан 2027 жылдан бастап төлем болады деп жоспарлап отырмыз, – деді А.Бердалин Сенаттағы ветеринариялық қызмет тақырыбын талқылауға арналған Үкімет сағатынан соң тілшілер сұрағына жауап беріп.
Осылайша ол 2027 жылдың қаңтарынан ауылдағы ветеринария мамандары 400 мың теңгеден астам жалақы алатынын растады.
Қоса кетейік, бұған дейін вице-министр «ветеринария» мамандығында оқып жатқан студенттердің шәкіртақысын өсіру мәселесін де көтерген болатын.
– Қазіргі уақытта елімізде «Ветеринария» бағыты бойынша кадрлар даярлауды 11 жоғары оқу орны жүзеге асырады, оның ішінде үшеуі Ауыл шаруашылығы министрлігінің жүйесінде. Олар 2025 жылға бөлінген 1001 (77,5%) грантты алды. Бұл ретте, өту балы жалпы конкурста – 62 балды, ауылдық квотада 56 балды құрады, – деген болатын Аманғали Бердалин сол жолы Сенатта.
Еске салсақ, өткен күзден бастап педагогикалық мамандықта оқитын студенттердің айлық стипендиясы 84 мың теңге болды.
Оқи отырыңыз
