Даңқты қолбасшы Бауыржан Момышұлының есімін иеленген орта мектеп Тарбағатай ауданына қарасты Жаңаауыл ауылдық округінің Сарыөлең ауылында орналасқан. Жаңа типтік мектеп батырдың 115 жылдық мерейтойы қарсаңында пайдалануға берілген, деп хабарлайды Aitainews.kz тілшісі.

Білім ордасы 550 млн теңгеге салынған. Жобалық қуаты 50 оқушыға шағын комплектілі мектепте қазіргі кезде 27 оқушы білім алуда. Құрылыс өткен жылдың сәуір айында басталып, қазан айында толық аяқталған. 

Мектеп электр термофоны арқылы жылытылады, қол жуатын бөлмелер, дәретхана да ішінде қарастырылған. Мұнда ауылдың бүлдіршіндеріне арналған шағын орталық та орналасқан. 

Аудан әкімі айтып өткендей, мұндағы басты мәселе – оқушылар санының аздығы. Бұл бағытта өзге облыстардың аудандарынан отбасыларды ауылға тұрақты тұруға шақыру жұмыстары жүргізіліп жатыр. Таяу күндерде алғашқы отбасылар ауылды көруге келмек.

Аймақ әкімі Нұрымбет Сақтағанов жаңа жылда қызметін бастаған білім мекемесімен танысып, интернеттің жылдамдығын тексерді. Қажет болса, тиісті қолдау көрсетілетінін атап өтті. Бірінші кезекте білімнің сапасына баса назар аударуды айта келе, мектеп ұжымына интерактивті панельді сыйға тартты.

Дәл осындай типтегі екінші жаңа білім ордасы Шығыстан шыққан Кеңес Одағының батыры Төлеген Тоқтаровтың атын иелеген негізгі орта мектеп Қабанбай ауылдық округіне қарасты Тәуке ауылында орналасқан. 

Білім ошағының материалдық-техникалық базасына келсек, пәндік кабинеттер саны жетеу. Спорт залы, 30 орындық асхана, кітапхана және акт залы бар. Электрлік теплофонмен жылытылатын қазандықпен қамтамасыз етілген.

Ауыл ақсақалы Жеңісхан Тілебалдинов ауылдағы мектептің бала санын көбейту үшін көршілес Қытай мемлекетінен көшіп келген қандас ағайындармен кездесулер ұйымдастырылып жатқанын атады.

Ұстаз Қ.Біләлов атындағы мектеп-лицей аудан орталығы Ақжар ауылында орналасқан. Мектеп ғимараты типтік жоба бойынша салынған, жобалық қуаты – 357 оқушы. Білім ордасы 1983 жылы пайдалануға берілген. Мектептің жалпы аумағы – 5564,9 шаршы метр.

Мектеп директоры Альмира Шағыраеваның айтуынша, қатты отынмен жылытылатын ғимараттың жұмыс істеп тұрғанына қырық жылдан асқан. Әбден ескіргендіктен, күрделі жөндеуді қажет етеді. Осы уақытқа дейін тек ішінара ғана ағымдағы жөндеу жасалып келген.

Облыс әкімі Нұрымбет Сақтағанов мектеп кездесу барысында ұжымымен алдымен ғимараттың күрделі жөндеуіне қажетті жобалық-сметалық құжаттамасы толық жасалуы, жұмсалатын қаржы көлемі дәл анықталуы керектігін, одан кейін ғана нақты шешім қабылданатынын атап өтті. 

Фото: Артём Жигулин

Видео: Жәнібек Ырысбай