Президент Қасым-Жомарт Тоқаев бүгін Қаржылық мониторинг агенттігінде өткен жиында экономикалық қылмыс, криптовалюта арқылы капитал шығару, қаржылық алаяқтық және бизнесті негізсіз тексеру мәселелеріне қатаң баға берді, деп хабарлайды Altainews.kz Ақордаға сілтеме жасап.

Мемлекет басшысы агенттіктің бес жыл ішінде елдің экономикалық және ұлттық қауіпсіздік жүйесінде маңызды дербес құрылымға айналғанын атап өтті.

Қасым-Жомарт Тоқаевтың айтуынша, құқық қорғау органдары цифрлық технологиялар мен жасанды интеллектіні жаппай енгізбесе, бұл ұлттық қауіпсіздікке тікелей қауіп төндіреді.

Президент әлеуметтік салаға бөлінген қаржының жымқырылуы мен криптовалюта арқылы шетелге шығарылуын «ақылға сыймайтын жағдай» деп атады.

Президенттің мәліметінше, бүгінде 62 миллиард теңгеден астам қаржы айналымы бар 130 заңсыз криптоалмасу қызметі жойылған.

Қазақстан 2023 жылдан бері «Эгмонт» тобының қаржылық барлау бірлестігінде Еуразия аймағының мүддесін қорғайды. 20 ірі криптобиржамен сындарлы серіктестік орнатылды. Орталық Азия елдерінде құрылған осындай алғашқы блокчейн-талдаумен айналысатын «Криптон» арнайы құрылымдық бөлімшесі ашылды. Былтыр қаржыны қолма-қол ақшаға айналдыратын 200-ге жуық жалған компания әшкереленді. Олардың заңсыз айналымдағы қаражаты 500 миллиард теңгеден асады. Сексеннен астам қылмыстық топ құрықталды. 100-ден астам қаржы пирамидасы жойылды. 

Президент кәсіпкерлерге заңсыз қысым көрсету фактілеріне де тоқталды.

Оның айтуынша, 2025 жылы Қаржылық мониторинг агенттігі қозғаған 2710 істің 1061-і негізсіз деп танылып, тоқтатылған.

Жиын соңында Қасым-Жомарт Тоқаев қызметтік борышын үлгілі атқарған Қаржылық мониторинг агенттігінің бірқатар қызметкерін мемлекеттік наградалармен марапаттады.

Фото: Ақорда