Өскеменнің Торпедо хоккей клубы өз тарихында ең үздік IIHF Құрлықтық кубогі турнирінің күміс жүлдегері атанып, ел спорты үшін елеулі жетістікке қол жеткізді. 2025–2026 жылғы маусымның финалдық кезеңі Ұлыбританияның Ноттингем қаласында өтіп, өскемендік ұжым халықаралық аренада жоғары деңгейдегі ойын көрсетті, деп хабарлайды Altainews.kz тілшісі. 

Құрлықтық кубоктағы күміс жүлде жалпы отандық хоккей үшін де маңызды белеске айналды. Бұл қазақстандық клубтардың еуропалық деңгейде бәсекеге қабілетті екенін паш етті. Команда елге оралған соң бірден Қазақстан чемпионатының тұрақты ойындарына дайындықты бастап кетті. «Торпедо» бүгін өз алаңында петропавлдық «Құлагер» командасын қабылдады. Шығыс Қазақстан облысының әкімі Нұрымбет Сақтағанов ойын барысын тамашалап, «Торпедоны» тарихи жеңісімен құттықтап, жүрекжарды тілегін жеткізді.

Аймақ басшысы ойыншыларға арнайы «Алғыс хатын» табыстады. Нұрымбет Сақтағанов салтанатты рәсімнен кейін өскемендік хоккейшілер мен Петропавлдан келген «Құлагер» командасының ойыны алдында символикалық шайба тастау рәсімін өткізді.

Айта кетейік, бұл клуб тарихындағы Континенталдық кубоктағы ең үздік нәтиже. Бұған дейін «Торпедо» хоккейшілерінің ең жоғары жетістігі 2007-2008 жылғы маусымда жеңіп алған қола жүлде болатын.

Жалғас Сакадиев
Жібек Нұрахмет