ШҚО ормандарын қорғау шарасы күшейтілді: өңірде 138 жаңа техника пайдалануға берілді
Кенді Алтайда орман қорын сақтау тек экологиялық емес, ұлттық қауіпсіздік деңгейіндегі өзекті мәселе. Осы жауапкершілікті ескере отырып, өңірде соңғы жылдары орман шаруашылығын материалдық-техникалық тұрғыдан күшейтуге бағытталған елеулі жұмыстар жүзеге асуда. Бұл ретте бүгінгі салтанатты жағдайда табыс етілген жаңа техника мен заманауи бақылау құралдары – орман өрттерінің алдын алу, жедел әрекет ету және табиғи ресурстарды қорғаудағы жүйелі саясаттың нақты көрінісі, деп хабарлайды Altainews.kz тілшісі.
Ел аумағындағы барлық орман алқаптарының шамамен қырық пайызы Шығыс Қазақстанға тиесілі. Алтайдың асқақ сілемдері мен қалың қарағайлы белдеулері тамсанар табиғи байлықпен қатар, ұрпақ алдындағы аманат. Осындай ауқымды орман әлеуеті өңірге ерекше жауапкершілік жүктейді, ал оны сақтау мен қорғау – күн сайынғы табанды еңбекті талап ететін күрделі міндет. Аймақ басшысы Нұрымбет Сақтағанов сала мамандарын маңызды оқиғамен құттықтап, атқарылып жатқан жұмыстардың өңір үшін стратегиялық маңызға ие екенін атап өтті.
Соңғы жылдары облыста орман шаруашылықтарының материалдық-техникалық базасын нығайту бағытында жүйелі әрі мақсатты жұмыстар атқарылып келеді. Соңғы жеті жыл ішінде бюджет қаражаты есебінен жалпы құны 2,2 млрд теңгені құрайтын 107 бірлік техника сатып алынды. Биыл бұл жұмыс жаңа серпін алып, Өнеркәсіпті дамыту қоры арқылы шамамен 3,9 млрд теңгеге 122 бірлік техника, сондай-ақ облыстық бюджет есебінен 240 млн теңгеге 16 бірлік жоғары өтімді арнайы техника алынды.
Салтанатты табыстау рәсіміне орман шаруашылығы саласының мамандары, күн мен түнге қарамай табиғат тыныштығын күзетіп жүрген жандар қатысты. Бұл техника – орман өрттерінің алдын алудағы сенімді қалқан, қауіп төнген сәттегі жедел әрекеттің кепілі. Жаңа мүмкіндіктер орман қорғау жұмыстарының тиімділігін арттырып, өрт ошақтарына дер кезінде жетуге, табиғи апат салдарын барынша азайтуға жол ашады.
Қабылданған шаралар сала қызметкерлерінің еңбек жағдайларын жақсартуға, орман қорын қорғау тиімділігін күшейтуге, орман өрттерінің алдын алу мен оларға жедел әрекет етуге, сондай-ақ орманды қалпына келтіру іс-шараларын жүйелі жүргізуге бағытталған. Табыс етілген техника өз міндетін адал атқарып, Шығыс Қазақстан облысының орман шаруашылығының дамуына елеулі үлес қосары сөзсіз.
Фото: Жібек Нұрахмет
Видео: Руслан Акматалиев
