Қазақстанда жасанды интеллектіге маманданған арнайы университет құрылады. Бұл туралы Үкімет отырысында ғылым және жоғары білім министрі Саясат Нұрбек мәлімдеді, деп хабарлайды Altainews.kz.

Бұл бастама Мемлекет басшысының тапсырмасына сәйкес жүзеге асырылады. Жаңа университет жасанды интеллект саласына қажетті мамандарды даярлауға бағытталады. Оқу орны тек бір бағытпен шектелмей, әртүрлі салаларды қамтитын пәнаралық мамандықтар бойынша кадрлар дайындайды. Сонымен қатар қолданбалы ғылыми зерттеулер жүргізу де басты мақсаттардың бірі болмақ.

Министрдің айтуынша, университет Alem.ai экожүйесінің құрамына еніп, шетелдің жетекші университеттері мен ірі технологиялық компаниялармен бірлесе жұмыс істейді. Бұл студенттерге халықаралық тәжірибе мен заманауи білім алуға мүмкіндік береді.