Өскемен қаласында волейболдан қыздар командалары арасындағы республикалық Кубок өз мәресіне жетіп, ел чемпионатының тағы бір айтулы жеңімпазы анықталды. 21–29 желтоқсан аралығында облыс орталығында Қажымұқан атындағы жекпе-жек сарайында өткен ала доп додасына Қазақстанның түкпір-түкпірінен келген сегіз команда қатысты, деп хабарлайды Altainews.kz тілшісі.

Республикалық Кубок аясында Талдықорғанның «Жетісу», Петропавлдың «QUANYSH», Түркістанның «Тұран», «AQTOBE», «Қарағанды», «Алматы», қызыордалық «Қайсар» және Шығыс Қазақстанның «BEREL» өзара бәсекеге түсті. 

Турнир басынан-ақ ойын тартысты әрі күтпеген нәтижелерге толы болды. Тіпті тәжірибелі спорт мамандарының өзі жарыстың немен аяқталатынын дәл болжай алмады. Жартылай финалда Түркістан облысының «Тұран» командасы ел чемпионатының үздіктерінің бірі саналатын BEREL-ді жеңіп, үлкен сенсация жасаған еді. Ал финалдық кездесуде «Тұран» Солтүстік Қазақстан облысының мықты ұжымы – «QUANYSH» командасын қапы қалдырып, республикалық Кубоктың жеңімпазы атанды.

Жарыс қорытындысы бойынша:

1-орын — «Тұран»

2-орын — «QUANYSH»

Жүлделі үшінші орын үшін «Жетісу» мен «BEREL» командалары арасындағы ойын өте тартысты өтті. Жерлестеріміз бұл жолы жеңісті жетісулықтарға беріп, төртінші орынды қанағат тұтты. Үшінші орынның тұғырына “Жетісу» командасы көтерілді. 

Волейболдан қыздар арасындағы Республикалық Кубоктың жеңімпаздарын ШҚО әкімі Нұрымбет Сақтағанов құттықтады. 

Жеңімпаздарды ұлықтау салтанатында жарыстың үздік ойыншылары да анықталып, сыйлықтармен марапатталды. 

– Бұл ойында күрделілік те, команданың ішіндегі достық та айқын сезілді. Ойын өте тартысты өтті. Күш-жігер мен табандылықтың арқасында Қазақстан кубогының чемпионы атандық. Мен өз командамдағы қыздарға және бапкерлер штабына сіңірген еңбектері үшін шын жүректен алғыс айтамын, – дейді бірінші маусымдағы ойының өткізген “Тұран” командасының ойыншысы Andjelka Novosel.

Турнирдің жоғары деңгейде өткенін және нәтижелердің тосын болғанын спорт мамандары да атап өтті. Республикалық жарыстың қорытындысына қатысты Кубоктың бас төрешісі Александр Кувшинов өз пікірін білдірді.

«Тұран» командасының жаттықтырушы-аналитигі, волейболдан халықаралық дәрежедегі төреші Қуатбек Айдарбеков ойынға қатысты ойын ортаға салды.

«Жетісу» волейбол клубының бас жаттықтырушысы “BEREL» командасының өте мықты, қауіпті команда болғанын айтты. 

Республикалық Кубокты ұйымдастыруға Қазақстан Республикасы Туризм және спорт министрлігінің Спорт және дене шынықтыру істері комитеті, Қазақстан волейбол федерациясы, Шығыс Қазақстан облыстық волейбол федерациясы, сондай-ақ «BEREL» волейбол клубы атсалысты.

Өскеменде өткен бұл дода әйелдер волейболының дамуына серпін беріп қана қоймай, аймақтың ірі спорттық жарыстарды жоғары деңгейде қабылдай алатынын тағы бір мәрте дәлелдеді. Ал күтпеген нәтижелерге толы турнир республикалық волейболдың бәсекелестік деңгейі жылдан-жылға артып келе жатқанын көрсетті.

Фото: Артем Жигулин 

Видео: Жәнібек Ырысбай