Шығыс Қазақстан облысының әкімі Нұрымбет Сақтағанов әлеуметтік желі арқылы соңғы күндері Өскемен тұрғындарынан қар тазалау сапасы мен қоғамдық көліктің жұмысына қатысты сұрақтар мен шағымдардың жиілеуіне байланысты облыс орталығында атқарылып жатқан жұмыстардың барысын бағамдап, бірқатар нақты тапсырма берді, деп хабарлайды Altainews.kz тілшісі.

Аймақ басшысы қаланың орталық көшелерімен қатар шеткі аумақтардағы учаскелердің жағдайын және қоғамдық көліктің қозғалысын тексеріп, қала әкіміне сын-ескертпелер айтты.

Облыс әкімі қыс мезгілінде бейберекет іс-қимылға жол беруге болмайтынын атап өтіп, тұрғындардың күнделікті қозғалыс қауіпсіздігі әрдайым басты назарда болуы тиіс екенін жеткізді. Оның айтуынша, ең алдымен әкімдік пен басшылықтың үйіне апаратын жолдар емес, халық көп жүретін аумақтар тазалануы қажет.

Нұрымбет Сақтағанов коммуналдық қызметтердің жұмысына қатысты ескертпелер білдіріп, қала әкіміне кәсіпкерлермен және ғимарат иелерімен түсіндіру жұмыстарын күшейтуді тапсырды. Іргелес аумақтардың уақытылы әрі сапалы тазалануы – баршаға ортақ жауапкершілік.

Сонымен қатар, облыс әкімі коммуналдық техниканың жай-күйін нақты бағалап, қысқы кезеңге алдын ала дайындықты күшейту қажеттігін баса айтты.

Тексеру барысында Нұрымбет Сақтағанов қоғамдық көлікке мініп, жолаушылардың қызмет сапасына қатысты пікірлерін тыңдады. Осы ретте қала әкіміне қоғамдық көлік жұмысына жеке бақылау жүргізуді тапсырды.

Аймақ басшысы автобустардың уақтылы қатынауы мен көшелердің дер кезінде қардан тазалануы өскемендіктер үшін қолайлы әрі қауіпсіз орта қалыптастырудың негізгі көрсеткіштері екенін атап өтті.