Шемонаиха ауданына жұмыс сапарымен барған облыс әкімі Нұрымбет Сақтағанов аудандық мәдениет үйінде жергілікті жұртшылықпен кездесіп, өңірдің әлеуметтік-экономикалық дамуына қатысты толыққанды баяндама жасап, есептік кездесуін өткізді. Сонымен қатар аудан алдында тұрған нақты міндеттерді айқындап, салалық басқармаларға тиісті тапсырмалар жүктеді, деп хабарлайды Altainews.kz тілшісі.   

ТУРИЗМ САЛАСЫНДА ТӨРТ ЖОБА ЖҮЗЕГЕ АСЫРЫЛУДА

Шемонаиха ауданының 2029 жылға дейінгі даму жоспары бойынша 127,3 млрд теңге жеке инвестициялар тарту жоспарланған. 

Айталық, Шемонаихада туристерді қабылдауға арналған 22 орын тіркелген. Осы жылы ауданда туризм саласында жалпы құны 68 млн теңгені құрайтын төрт жоба іске асырылуда. Нұрымбет Сақтағанов өз сөзінде аудан әкіміне визит орталығыг ашу бойынша ұсыныстар енгізуді, «ҚазАвтоЖол» ҰК» АҚ ШҚО филиалымен бірлесіп, республикалық тасжол бойында санитарлық-гигиеналық тораптарды орнатуды қамтамасыз етуді тапсырды. 

Ауданда мал шаруашылығы да дамып келеді. Бүгінде 20 мың бас ірі қара, 12 мың бас қой мен ешкі, үш мың жылқы бар. Осы жылдың 10 айында шаруашылықтар үш мың тонна ет өндірді. Жалпы аудан аумағында 10 сүт-тауарлы ферма және 1,9 мың басқа арналған екі мал бордақылау алаңы жұмыс істеп тұр. 

Облыс әкімі аудан басшысы Дидар Кеңесбаевқа облыстық ауыл шаруашылығы басқармасымен бірлесіп, ауыл шаруашылығы өнімдерін өндірудің жаңа жобалары, оның ішінде «Ауыл аманаты» аясында ұсыныстар енгізуді тапсырды.

ЕКІ ЫҚШАМ АУДАНДА СУ ҚҰБЫРЫ ЖЕЛІЛЕРІ ЖАҢҒЫРТЫЛДЫ

Халықпен кездесу барысында Нұрымбет Сақтағанов сумен жабдықтау жұмыстарының барысына да ерекше тоқталды. 

Сондай-ақ, осы жылы жергілікті бюджет есебінен Первомайский кентінде, Барашки ауылында, Шемонаиха қаласында су желілері жөнделген.

Облыс әкімі жиында халықты интернетпен қамту барысына туралы ақпарат берді. Қазіргі уақытта Шемонаиха жұртшылығының 95,1%-ы астамы интернетке қосылған. 

Аудандағы алты мектепті жоғары жылдамдықты интернетпен қамтамасыз ету мақсатында Starlink орнатылған. Көлік жолдарындағы байланыстың жоқтығы мәселесін шешу үшін биіктігі 60 метрлік антенна-мачталық діңгекті республикалық тасжол бойында орнатуға жобалық құжаттама әзірленуде.

АУДАНДА АУРУХАНА ТАПШЫЛЫҒЫ ЖОЙЫЛАДЫ

«Келешек мектептері» ұлттық жобасы аясында өткен жылы Шемонаиха қаласында 300 орындық жаңа мектеп бой көтерді. 14 нысанға жөндеу жүргізіліп, екі білім шаңырағына физика және химия кабинеттері сатып алынды. Биыл ауданда сегіз білім нысаны жөндеуден өтті. Сондай-ақ, бес мектепке жеті оқу кабинеті сатып алынды. 

Медицина саласында да оң өзгерістер бар. «Ауылдық денсаулық сақтауды жаңғырту» ұлттық жобасы аясында Волчанка ауылында дәрігерлік амбулаторияның құрылысы аяқталуға жақын. Ауданның денсаулық сақтау ұйымдарының медициналық техникамен жабдықталуы 89,3%-ды құрайды.

Осы жылдың басынан бері Шемонаихада қатерлі ісікке шалдыққандар 12,8%-ға, қант диабеті 33,2%-ға төмендеді. Нәресте мен ана өлімі тіркелген жоқ.

ЖОЛ ДА БОЛАДЫ, КӨПІР ДЕ ЖӨНДЕЛЕДІ

Есепті баяндамадан соң облыс басшысы тұрғындар тарапынан қойылған сауалдарға жауап берді. Шемонаихалықтар «аудан орталығы Шемонаиха қаласының № 3,4,5, ықшам аудандарында жеке дәрігерлік амбулаториялар бола ма, орталықтағы ұзын Вокзальная көшесі жөнделе ме, аудан орталығына кіре берістегі Уба өзені үстіндегі негізгі үлкен көпір қашан жөнделеді?» деген сауалдар жолдады. Аталған сауалдардың барлығына да облыс әкімі тарапынан оң жауаптар берілді. Мәселен, амбулаториялар құрылысы келер жылдың ақпан, наурыз айларында басталатын болса, көпшілікті алаңдатқан бас көпірдің жөндеуі де 2026 жылы басталмақ. Қазіргі уақытта құрылыстың тиісті құжаттамалары әзірлену үстінде. Вокзальная көшесі осы көпірден басталатындықтан, онда да автоматты түрде жөндеу жұмыстары жалғасады.

Сапар аясында аймақ басшысы ауданның аумағында орналасқан жаңа өрт сөндіру бекетінде болды және «Шемонаиха ұн тарту-құрама жем комбинаты» ЖШС-нің жұмысымен танысты.

ЖАҢА БЕКЕТТЕР ҚАУІПТІҢ БЕТІН ДЕП КЕЗІНДЕ ҚАЙТАРАДЫ 

Шемонаиха ауданында үш мемлекеттік өртке қарсы бөлімше және жеті өрт сөндіру бекеті жұмыс істейді. Соның ішінде биыл Камышинка және Октябрьское ауылдарында қосымша өрт сөндіру бекеттері ашылды.

Бұл өрт сөндіру бекеттері аудан әкімдігі мен шаруашылықтардың күшімен ашылып, ҚР ТЖМ тарапынан берілген арнайы техникамен толық жарақтандырылған.

Шығыс Қазақстан облысының әкімі Нұрымбет Сақтағанов Төтенше жағдайлар министрлігінің «Ауыл құтқарушылары» бағдарламасын іске асыру аясында Вавилон ауылдық округіне қарасты Сугатoвка ауылындағы өрт сөндіру бекетіне барып, өртке қарсы жабдықтардың дайындығымен танысты. 

Бағдарлама ауылдық жерлерде өрт қауіпсіздігі деңгейін арттыруға және төтенше жағдайларға жедел ден қоюға бағытталған.

Алдағы уақытта аталмыш өрт сөндіру посты облыс әкімі мен ҚР ТЖ министрінің қатысуымен ресми түрде ашылмақ. Жаңа нысан өрттер мен басқа да төтенше жағдайларға әрекет ету уақытын айтарлықтай қысқартып, өңірдегі өрт қауіпсіздігін арттыруға мүмкіндік береді.

Өрт сөндіру бекеті барлық қажетті жабдықтармен және техникамен қамтамасыз етілген. Бұл жөнінде облыс әкімі Нұрымбет Аманұлына облыстық ТЖД бастығы, полковник Рашид Бекетұлы баяндады. 

Өрт сөндіру посты Сугатoвка ауылының (561 адам), сондай-ақ жақын орналасқан Горкуново (83 адам) және Кенюхово (244 адам) ауылдарының тұрғындарына қауіпсіздікті қамтамасыз ету мүмкіндік бермек және тұрғын үйлерге, шаруашылықтарға, әлеуметтік инфрақұрылымға тілсіз жаудан келуі ықтимал шығын қаупін барынша азайтады.

Аудандағы «Заря» шаруа қожалығы өңірдің әлеуметтік инфрақұрылымын дамытуға белсенді атсалысып келеді. Осы өрт сөндіру бекетін салу бастамасы шаруашылық басшыларының қолдауымен жүзеге асырылып, ауыл тұрғындарының қауіпсіздік деңгейін арттыруға бағытталып отыр.

ӨНІМ ҚЫТАЙ МЕН ОРТА АЗИЯ ЕЛДЕРІНЕ ЭКСПОРТТАЛАДЫ

Облыс әкімі Нұрымбет Сақтағанов Шемонаиха ауданына жұмыс сапары аясында Шемонаиха ұн тарту-құрама жем комбинатының тыныс-тіршілігімен танысты.

Кәсіпорын басшысының айтуынша, аталған инвестициялар шикізат сатып алу үшін айналым қаражатын ұлғайтуға бағытталған. Сонымен қатар «Өрлеу» бағдарламасы бойынша екінші деңгейлі банк арқылы 1,5 млрд теңге көлеміндегі қаражат дәнді және майлы дақылдарды сақтауға арналған жалпы сыйымдылығы 20 мың тонна болатын қосымша сақтау кешенін салуға жоспарлануда.

Техникалық жарақтандырылуына келер болсақ, құрама жем өндірісі Түркияда өндірілген «Endustriyel Elektrik Sanayi ve Ticaret LTD Sti» жабдығында жүргізіледі. Өндірістік қуаты – сағатына 15 тонна. Жемді 25 және 40 келілік қаптарға қаптау желісі бар. Линиялық типтегі элеватор – 20 мың тонна сақтау көлемімен жұмыс істейді. Бұған қоса механикаландырылған қоймалар – екі мың тоннаға дейін өнім сақтауға мүмкіндік береді. Ұзындығы 1834 метр, 49 вагон қабылдайтын теміржол тармағы бар.

Шемонаиха ұн тарту-құрама жем комбинаты директоры Тимур Жамалұлы айтып өткендей, мұндағы өнім түрлері ірі қара малға арналған толыққанды теңгерімді жемдер (сауын мал, бордақылау), бұзауларға арналған жемдер (6 ай, 6-12 ай ұсақ мал) және ауыл шаруашылығы құстарына арналған жемдерді қамтиды.

Кәсіпорын 2025 жылғы 1 қарашадағы жағдай бойынша 55 адамды тұрақты жұмыспен қамтып отыр. Орташа жалақы үш жүз мың теңгені құрайды.

Алдағы уақытта комбинат ұжымының алдында өндіріс қуаттылығын жылына 30 мың тоннаға дейін арттыру, шикізат сақтау көлемін 60 мың тоннаға ұлғайту, Қытай Халық Республикасына жылына 20 мың тоннаға дейін жемдік ұн экспорттау мақсаты тұр.

Дәурен Аллабергенұлы

Фото: Жібек Нұрахмет