Энергетика саласының дамуы, инфрақұрылымды жаңғырту және отын-энергетика кешенін цифрландыру мәселелері Үкімет отырысында қаралды. Энергетика министрі Ерлан Ақкенженов Мемлекет басшысы қойған міндеттердің орындалу барысы туралы баяндады. Сондай-ақ, Өскемен мен Семейде түтін газдарын сүзудің озық жүйелері мен ауыр металдарды тұтып қалу технологиялары қолданылатын жылу электр орталықтарын салу жұмысын тездету тапсырылды, деп хабарлайды Altainews.kz тілшісі. 

Олжас Бектенов электр энергетика саласы әлемдік экономикада маңызды рөл атқаратынын, сонымен қатар ірі тау-кен металлургия кәсіпорындарынан бастап шағын бизнеске дейін бүкіл өнеркәсіп саласының өсу қарқынына тікелей әсер ететіндігі еске салды.

Премьер-министр Қазақстанның Батыс аймағын Бірыңғай энергетикалық жүйемен біріктіру және Оңтүстік аймақ желілерін күшейту жұмыстары қолға алынғанын атап өтті. Нәтижесінде еліміздің барлық өңірі энергиямен сенімді қамтамасыз етіледі.

Осы бағыттағы жұмыстарды жеделдету міндеті KEGOC компаниясына жүктелді. Үкімет басшысы энергетика жүйесінің тұрақтылығы үшін жеткілікті маневрлік қуаттардың маңызына назар аударды.

Бұдан бөлек Олжас Бектенов цифрландыру энергия тиімділігін арттырып қана қоймай, бүкіл саланың сенімді жұмысын қамтамасыз ететін негізгі тетікке айналуы тиіс екендігін баса айтты.

Энергетика министрі Ерлан Ақкенженов Үкімет отырысында энергетикалық инфрақұрылымды жаңғырту және жаңа қуат көздерін енгізу жұмыстарының барысын баяндады.

Министрдің айтуынша, елімізде бүгінде 237 электр стансасы бар, оның 79-ы дәстүрлі генерация көздері, ал 158-і жаңартылатын энергия көздері болып табылады.

«Энергетика саласын 2035 жылға дейінгі дамыту жоспары» аясында жалпы 26 гигаватттан астам жаңа қуат көздерін іске қосу жоспарланып отыр. Бұл жұмыстар қолданыстағы стансаларды жаңғырту және жаңа генерациялық нысандар салу арқылы жүзеге асырылады. Ал жоспар бойынша алдағы төрт жылда Қазақстан энергия тапшылығын жояды. Министр 2029 жылға дейін еліміздің энергетика жүйесінде жаңадан 6,7 ГВт қуат көздерін іске қосуға мүмкіндік беретін 68 жоба жүзеге асырылатынын атап өтті.

Оның айтуынша, 2025 жылы 621 МВт жаңа қуат көздері, 2027 жылы 1 500 МВт, ал 2028 жылы 2 000 МВт астам қуат іске қосылады.

Сондай-ақ, Мемлекет басшысының тапсырмасына сәйкес, көмірден алынатын қуат көзін таза көмір технологиясы базасында дамыту жоспарлануда.

Сонымен қатар Екібастұз ГРЭС-3 (2 640 МВт) құрылысына инвестор айқындалған, ал Курчатов қаласында 700 МВт-тық жылу электр станциясын салу үшін тендер жариялануда.

Энергетика министрлігі отын-энергетика кешенін цифрландыру шеңберінде «EnergyTech» атты бірыңғай мемлекеттік басқару жүйесін енгізуді бастады.

Биыл 7 цифрлық сервис іске қосылды, оның ішінде күзгі-қысқы кезеңге дайындықты және шекті тарифтерді бекітуге мониторинг жүргізетін сервистер бар.

Энергетика министрлігінің мәліметінше, отын-энергетика кешеніне жасанды интеллект технологияларын енгізу мәселесі пысықталуда.

Сонымен қатар ЖИ шешімдері бар ғаламдық вендорлар мен IT-компаниялардан тұратын AI-альянс құрылған. Astana Hub резиденттерімен салаға ЖИ шешімдерін енгізу және сынақтар өткізу туралы меморандумдарға қол қойылған.

Премьер-министр Олжас Бектенов атап өткендей, энергетика саласының тұрақты дамуы ел экономикасының барлық секторына серпін береді. Жаңғыртылған инфрақұрылым мен цифрлық шешімдер Қазақстанның энергетикалық қауіпсіздігін нығайтып, экспорттық әлеуетін арттыруға мүмкіндік береді.

Айгүл Базарова

Фото: ҚР Үкіметі