Қазақстан Республикасының Қаржылық мониторинг агенттігі заңсыз ойын бизнесін ұйымдастыру ісі бойынша шетел азаматтарына іздеу жариялады, деп хабарлайды Altainews.kz.

Агенттіктің мәліметінше, 1970 жылғы 27 маусымда туған АҚШ азаматы Дмитры Дружинскыге, сондай-ақ 1985 жылғы 8 қарашада туған Украина азаматы Марина Левковичке (Гинзбург) қатысты соттың санкциясымен сырттай «қамауда ұстау» түріндегі бұлтартпау шарасы қолданылған.

Аталған тұлғалар Қазақстан Республикасының аумағында заңсыз ойын бизнесін ұйымдастырды деген күдікке ілінді.

Тергеу барысында «PIN-UP» және «PINCO» брендтерімен жұмыс істеген онлайн-казино қызметін шетел аумағынан басқарған адамдар тобы ұйымдастырғаны анықталды. Қылмыстық схема өзара байланысы бар компаниялар желісі арқылы жүзеге асырылған.

Дмитры Дружинскы мен Марина Левкович онлайн-казино қызметін үйлестірумен айналысып, сыбайластарды іріктеу, төлем ұйымдары мен екінші деңгейлі банктер өкілдерімен өзара әрекеттесу, сондай-ақ ақша қабылдау және шығару процестерін қамтамасыз ететін төлем инфрақұрылымын құруға және оның жұмыс істеуіне тікелей қатысқан.

Заңсыз қызметті бүркемелеу мақсатында «PIN-UP.KZ» брендімен букмекерлік қызметті жүзеге асыруға мемлекеттік лицензия алған «Бонами» ЖШС заңды тұлғасы құрылған.

Сонымен қатар қаржылық операцияларды жүргізу үшін онлайн-казиноның төлем агрегаторлары функцияларын атқарған «Gold Pay» ЖШС және «Cyber Pay» ЖШС (кейіннен — «Pinnacle Financial Solutions» ЖШС) сияқты төлем ұйымдарының желісі тіркелген.

Онлайн-казино клиенттерінен түскен қаражат транзиттік шоттарда жинақталып, кейін электрондық ақша операцияларын жүргізуге лицензиясы бар байланысы компаниялар арқылы криптовалютаға айырбасталған.

Қаржылық мониторинг агенттігі іздеуде жүрген тұлғалардың орналасқан жері туралы қандай да бір ақпарат белгілі болған жағдайда +7 (7172) 70-84-78 нөмірі арқылы кезекші бөлімге хабарласуды сұрайды.