Желді күні суға түскен төрт адамды құтқарушылар құтқарып қалды
Шығыс Қазақстан облысында төтенше жағдай тіркелді. Алтайка ауылы маңындағы Бұқтырма су қоймасында төрт адам мінген қайық аударылып кеткен. Құтқарушыларға адамдардың борт сыртында тұрғаны туралы хабарлама келіп түскен, деп хабарлайды Altainews.kz тілшісі.
Оқиға орнына жақын маңдағы балықшы бірінші болып көмекке ұмтылған. Ол төрт азаматты өз қайығына шығарып үлгерген.
— Құтқарушылар келген кезде адамдар балықшының қайығында болды. Жедел-құтқару жасағының қызметкерлері оларды өз катеріне отырғызып, жағаға аман-есен жеткізді. Ешқайсысына медициналық көмек қажет болмады, — деп мәлімдеді ШҚО ТЖД баспасөз қызметі.
Төтенше жағдайлар министрлігі судағы қауіпсіздік ережелерін сақтауға шақырады.
— Желді, дауылды күндері суға шығу қауіпті. Міндетті түрде құтқару кеудешелерін киіп, ауа райын алдын ала тексеріп отыру керек, — дейді ТЖМ мамандары.
Мамандардың айтуынша, мұндай оқыс жағдайлардың көбі қарапайым ережелерді елемеуден болады. Сондықтан қайықпен серуендеуге шықпас бұрын, қауіпсіздікке баса мән беру қажет.
Оқи отырыңыз
