Төтенше жағдайлар қызметінің басты міндеті – тұрғындардың қауіпсіздігін қамтамасыз ету, қиындыққа тап болған әрбір жанға дер кезінде қол созу. Осы бағытта Шығыс Қазақстан облысында құтқарушылардың кәсіби әлеуетін арттыру, техникалық базаны жетілдіру жұмыстары жүйелі түрде жалғасып келеді. Соның айқын дәлелі – жақында қызметке алынған жаңа Voyager 850 Cabin құтқару қайығы, деп хабарлайды Altainews.kz.

Жалпы қуаты минутына 500 литрге дейін суды итеріп қозғалтатын бұл қайық – су аймақтарында шұғыл құтқару операцияларын орындауға арналған заманауи техника. Ол ауа райы құбылып, жағдай күрделенген сәттерде де сенімді жұмыс істеуге бейімделген. Қайық екі қуатты қозғалтқышпен қамтамасыз етілгендіктен, ағынды суларда жылдам маневр жасап, қажетті нүктеге кідіріссіз жете алады.

Voyager 850 Cabin ішкі бөлігі құтқарушылар жұмысына толықтай бейімделген. Бортында байланыс жабдықтары, судағы бағыт-бағдарды анықтайтын навигациялық жүйелер, өмірді қамтамасыз ететін құралдар, алғашқы көмекке қажетті құрал-жабдықтар бар. Мұндай жарақтандыру қайықты тек құтқару құралы ғана емес, қауіп-қатер сәтінде жылжымалы штабқа айналдыра алады.

Су тасқыны, суға кеткен азаматтарды іздеу, су айдындарында қауіпсіздік шараларын күшейту – барлығы да жылдамдықты, техникалық дайындықты талап етеді. Жаңа қайықтың қызметке қосылуы – осы бағыттағы үлкен қадам. Енді құтқарушылар кез келген төтенше жағдайда жедел қимылдап, аймақ тұрғындарының өмірін аман сақтауға бұрынғыдан да тиімді әрі шапшаң кірісе алады.

ШҚО ТЖД өкілдері техниканы жаңғырту жұмыстары мұнымен тоқтамайтынын айтады. Тұрақты жаңару – қауіпсіздік деңгейін арттырудың негізгі кепілі. Осылайша облыс құтқарушыларының мүмкіндігі кеңейіп, олардың кәсіби дайындығы одан әрі нығая түсуде.

Заманауи техниканың келуі – тек ресми оқиға емес. Бұл – жүздеген адамның тағдырын сақтап қалуы мүмкін, аса маңызды адам өміріне бағытталған қадам. Әрбір осындай жаңару – қауіп-қатермен бетпе-бет келетін мамандардың сенімді серігі, олардың қолындағы ең құнды құрал.

Фото: ШҚО ТЖД