Биыл елімізде балаларға медициналық көмек пен оңалту қызметтері айтарлықтай кеңейіп, 125 мың бала әртүрлі медициналық бағдарламалармен қамтылды. Бұл елдің балалар денсаулығын қорғауға деген ерекше көңілінің айқын көрінісі болып отыр, деп хабарлайды Altainews.kz тілшісі ҚР Денсаулық сақтау министрлігінің баспасөз қызметіне сілтеме жасап.

Қазақстанда 2025 жылы балаларға медициналық көмек көрсету мен оңалту қызметтерін кеңейту бағытында ауқымды жұмыс атқарылды. Денсаулық сақтау министрлігінің мәліметінше, биыл «Қамқорлық» жобасы аясында Атырау, Қызылорда, Алматы, Маңғыстау, Жетісу және Ақмола облыстарында 6 бірдей жаңа ауданаралық оңалту орталығы ашылып, өңірлердегі балаларға арнайы қызметтердің қолжетімділігі артты.

Жалпы есеп бойынша, 2025 жылы 125 мың бала әртүрлі медициналық оңалту бағдарламаларымен қамтылды. Бұл – елімізде соңғы жылдары бала денсаулығына ерекше көңіл бөлініп отырғанының бір көрінісі. Министрлік мамандарының айтуынша, жаңа орталықтардың іске қосылуы тек емдеу сапасын арттырып қана қоймай, ата-аналардың да алаңсыз болуына мүмкіндік беріп отыр.

Сонымен қатар, елімізде балалар денсаулығына арналған мамандандырылған бағыттарды күшейту бойынша жүйелі жұмыс жалғасуда. Осы мақсатта «Қазақстан балалары» бірыңғай бағдарламасының тұжырымдамасы мен 2026–2030 жылдарға арналған кешенді іс-қимыл жоспары әзірленді. Бұл құжат мемлекет, ата-ана, педагог, медицина мамандары, әлеуметтік қызметтер мен үкіметтік емес ұйымдардың күшін біріктіретін алғашқы ортақ бағдарлама болып отыр. Бағдарлама баланың қауіпсіздігі мен денсаулығынан бастап, білім алу және психологиялық қолдауына дейінгі барлық бағыттарды қамтиды.

Балаларға арнайы қолдау көрсететін бірқатар жобалар да іске асырылуда. Соның бірі – «Сырлы дыбыс» жобасы. Есту қабілеті бұзылған балаларға арналған бұл бастама биыл заңмен бекітілді. 2026 жылдан бастап I-III дәрежелі есту қабілеті нашарлаған балалар сүйек өткізгіштік операцияларынан кейін жергілікті бюджет есебінен қажетті аудиопроцессорлармен және есту аппараттарымен қамтамасыз етілетін болады.

Ал «Ажарлы келбет» жобасы бет пен бастың туа біткен анатомиялық кемістіктері бар балаларға арналған реконструктивтік көмекті қамтиды. МӘМС жүйесіне енгізілген өзгерістер нәтижесінде енді мұндай балаларға пластикалық және реконструктивтік операциялар тегін жасалады. Бұл көптеген отбасылар үшін үлкен қолдау болып отыр.

Балалар денсаулығын қорғау – елдің болашағына жасалған инвестиция. Министрлік алдағы жылдары да оңалту орталықтарының желісін кеңейтіп, медициналық көмектің қолжетімділігін арттыруға күш салатынын мәлімдеді.

Фото: gov.kz