Қазақстан Ұлттық Банкі телефон арқылы жасалатын алаяқтықпен күресті күшейту мақсатында жаңа шара ұсынды. Енді банктер күмән тудырған ақша аударымдарын 24 сағатқа дейін уақытша бұғаттауға құқылы болады, деп хабарлайды Altainews.kz тілшісі.

Ұлттық Банктің түсіндіруінше, бұл норма алаяқтардың психологиялық қысымына түсіп, асығыс шешім қабылдайтын азаматтарды қорғауға бағытталған. Егер клиент банк ескертулеріне қарамастан ақша аударуға әрекет жасаса, қаржы ұйымы операцияны тоқтатып, мән-жайды анықтай алады.

Қазақстан Ұлттық Банкі төрағасының орынбасары Берік Шолпанқұловтың айтуынша, мұндай жағдайда клиент банк бөлімшесіне шақырылып, оның әрекетінің саналы екенін растау үшін жақын туысының қатысуы сұралуы мүмкін. Бұл азаматтарды эмоциялық күйде қабылданған шешімдерден сақтауға мүмкіндік береді.

Сонымен қатар, жеке тұлғалар арасындағы жаппай мобильді аударымдарға да бақылау күшейтіледі. Егер бір шотқа үш ай қатарынан ай сайын 100 және одан да көп түрлі адамнан ақша аударылса, банк мұндай операцияларды күмәнді деп танып, қосымша тексеріс жүргізуі мүмкін.

Банктер аударымдардағы түсініктемелерді көре алатындықтан, ақша жиі әрі мақсатсыз түскен жағдайда жасырын коммерциялық қызмет белгілерін анықтауы ықтимал. Мұндай жағдайда клиенттен қаражаттың шығу тегі мен аударым мақсатын түсіндіру талап етіледі.

Ал өз шоттары арасындағы аударымдар, мысалы, картадан депозитке немесе кері бағыттағы операциялар, қауіпсіз деп саналады және кәсіпкерлік қызмет ретінде қарастырылмайды.

Жаңа шаралар азаматтардың қаржылық қауіпсіздігін арттыруға және телефон алаяқтарының әрекеттерін азайтуға бағытталған.