Шығыс Қазақстанда жарты ғасыр бойы ауыл тұрғындарының денсаулығына қалтқысыз қызмет етіп келе жатқан медициналық мекеме жаңа дәуірге қадам басты. Бүгін Ұлан ауданына қарасты Асубұлақ кентінде күрделі жөндеуден өткен дәрігерлік амбулаторияның салтанатты ашылуы өтті. Бұл – тек бір ғимараттың жаңаруы емес, ауыл медицинасының сапалы өзгерістерге бет алғанының айқын көрінісі, деп хабарлайды Altainews.kz.

1970 жылдан бері үздіксіз жұмыс істеп келе жатқан амбулатория талай буынның өмірі мен денсаулығына куә болды. Уақытпен бірге тозған ғимарат биыл толық жаңғыртудан өтіп, қазіргі заманғы денсаулық сақтау талаптарына сай қайта түледі. Күрделі жөндеу барысында инженерлік желілер жаңартылып, емдеу кабинеттері заманауи медициналық құралдармен жабдықталды, пациенттер мен медицина қызметкерлері үшін қолайлы әрі қауіпсіз орта қалыптастырылды.

Бүгінде амбулаторияда 11 медицина қызметкері – 2 дәрігер, 6 орта буын және 3 кіші медицина маманы еңбек етеді. Олар 1700-ден астам тұрғынға алғашқы және жоспарлы медициналық көмекті үздіксіз көрсетіп келеді. Ең бастысы – соңғы жылдары нәресте, бала және ана өлімі тіркелмеген. Бұл көрсеткіш ауыл медицинасы үшін үлкен жетістік әрі мамандардың кәсіби біліктілігінің айғағы.

Мекеме жалпы тәжірибелі дәрігер мен акушер-гинеколог кабинеттерімен, емшара және егу бөлмелерімен, сондай-ақ үш орындық күндізгі стационармен қамтылған. Эпидемиологиялық қауіп төнген жағдайда тұрғындарды дер кезінде тексеруге арналған сүзгі-кабинет те жұмыс істейді. Сонымен қатар, ғимаратта жедел медициналық жәрдемнің қосалқы станциясының орналасуы шұғыл жағдайларда уақытты ұтуға мүмкіндік береді.

Жаңартылған амбулатория Асубұлақ кенті үшін тек медициналық нысан ғана емес, әлеуметтік тұрақтылық пен халықтың өмір сапасын арттыратын маңызды тірекке айналды. Мұндай жобалар ауылда қалуға, еңбек етуге және болашаққа сеніммен қарауға жол ашады.

Шығыс Қазақстанда денсаулық сақтау жүйесі жүйелі түрде жаңғырып келеді

Асубұлақтағы игі бастама – облыс көлемінде жүзеге асып жатқан ауқымды жұмыстардың бір бөлігі ғана. Шығыс Қазақстан облысында денсаулық сақтау саласын дамытуға соңғы жылдары ерекше көңіл бөлініп отыр. Облыс орталығында Ана мен бала және Гематология орталықтарын біріктіретін заманауи медициналық кластердің құрылысы жүріп жатыр. Оның құрамына 300 орындық көпсалалы аурухана енеді. Бұл жоба күрделі ем-диагностикалық қызметтерді өңір ішінде алуға мүмкіндік бермек.

Сонымен қатар мемлекеттік-жекеменшік әріптестік аясында Нефрология орталығын салу жоспарланған. Қаладағы ЖМК ауданында екі жекеменшік бастапқы медициналық-санитарлық көмек емханасы – TAU Clinic және Statusmedicalcenter ашылып, тұрғындарға қызмет көрсетуде.

Биыл облыстағы екі ірі медициналық мекемеде күрделі жөндеу жүргізіліп, оған 1,7 млрд теңге бағытталды. Ал 3,1 млрд теңгеге 200-ден астам медициналық жабдық сатып алынды. Нәтижесінде денсаулық сақтау нысандарының жарақтану деңгейі 89 пайызға жетті. Цифрлық медициналық жүйелер енгізіліп, тіркеу, бақылау және қашықтықтан кеңес беру мүмкіндіктері кеңейді.

Кадр даярлау да басты назарда. Соңғы екі жылда ондаған дәрігер мен медбике Ресей, Германия, Түркия клиникаларында білімін жетілдіріп, халықаралық тәжірибені меңгеріп қайтты. Бұл емдеу сапасын арттырып, заманауи әдістерді өңір медицинасына енгізуге жол ашты.

«Ауылдық денсаулық сақтауды жаңғырту»: нақты нәтижеге бағытталған ұлттық жоба

Асубұлақтағы амбулатория – Мемлекет басшысының тапсырмасымен жүзеге асып жатқан «Ауылдық денсаулық сақтауды жаңғырту» ұлттық жобасының нақты жемісі. Ел көлемінде бұл жоба ауыл тұрғындарына медициналық көмекті барынша жақындатуды көздейді.

Жоба аясында 655 алғашқы медициналық-санитарлық көмек нысанын салу жоспарланған болса, бүгінгі күні оның 646-сы пайдалануға берілді. Оның ішінде:

99 нысан – 2023 жылы,

361 нысан – 2024 жылы,

186 нысан – 2025 жылы салынды.

Бұл медициналық пункттер, фельдшерлік-акушерлік бекеттер мен дәрігерлік амбулаториялар 1 миллионға жуық ауыл тұрғынын медициналық көмекпен қамтып отыр.

Сонымен бірге, 32 аудандық аурухана көпбейінді орталық деңгейіне дейін жаңғыртылуда. Бұл шаралар күрделі медициналық көмекті аудан деңгейінде алуға мүмкіндік беріп, облыс орталықтарына тәуелділікті азайтады.

Мамандардың бағалауынша, жаңа инфрақұрылым инсульт пен инфаркт кезінде «алтын сағатта» көмек көрсету мүмкіндігін арттырып, жүрек-қан тамыр ауруларынан болатын өлім-жітімді 20 пайызға дейін төмендетуге ықпал етеді. Төрт миллионнан астам ауыл тұрғыны жоғары технологиялық медициналық қызметке қол жеткізеді.

Ауылдық денсаулық сақтауды жаңғырту – тек құрылыс пен жөндеу емес, бұл – халықтың өмір сапасына салынған инвестиция. Асубұлақтағы 50 жылдық амбулаторияның жаңаруы – елдегі жүйелі реформалардың жергілікті деңгейде нақты нәтиже беріп жатқанын көрсетеді. Алдағы жылдары бұл өзгерістер ауыл медицинасының қолжетімді ғана емес, сапалы, уақтылы әрі қауіпсіз болуына негіз қалайды.