Бүгін Өскеменде Қазақстан халқы Ассамблеясының 30 жылдығына орай Достық үйлерінің І республикалық конгресі өз жұмысын бастады, деп хабарлайды Altainews.kz тілшісі.

Екі күнге жалғасатын ауқымды шараға еліміздің барлық өңірінен 100-ден астам делегат келді. Олардың қатарында Достық үйлерінің директорлары, этномәдени бірлестіктердің өкілдері, сарапшылар, мемлекеттік органдар қызметкерлері және жастар бар.

Шараның ашылуында сөз сөйлеген Шығыс Қазақстан облысының әкімі Нұрымбет Сақтағанов Ассамблея институтының ел бірлігін сақтаудағы ерекше рөлін атап өтті.

Конгресс аясында еліміздегі Достық үйлерінің осы уақытқа дейінгі атқарған игі істері сараланып, алдағы ауқымды жоспарларды жүзеге асыру жолдары талқыланды. Сондай-ақ, тәжірибе алмасу, жұмыс барысында кездесетін кемшіліктерді жою мәселелері күн тәртібіне қойылды.

Қазақстан халқы Ассамблеясы төрағасының орынбасары Марат Әзілханов өз сөзінде этносаралық бірліктің маңыздылығына тоқталды:

Конгресс барысында этносаралық келісімді нығайтудың жаңа тетіктері ұсынылып, Достық үйлерінің үздік тәжірибелері ортаға салынды.

Ертең жиын Риддер қаласында жалғасып, қорытындыланбақ. «Ассамблея жастары» атты мектеп аясында жас делегаттар ашық диалог форматында бас қосып, этносаралық татулық пен қоғамдық белсенділікті арттыру жолдарын талқылайды.

Айта кетейік, биыл Қазақстан халқы Ассамблеясының құрылғанына 30 жыл толып отыр. Бұл – бүкіл ел үшін маңызды қоғамдық-саяси оқиға. Әсіресе, Шығыс Қазақстан үшін бұл дата ерекше мәнге ие. Себебі алғашқы этномәдени бірлестіктер мен алғашқы Достық үйі дәл осы өңірде құрылған еді.

Фото/видео: Жалғас Сақадиев