Шығыс Қазақстан облысында бір топ мемлекеттік қызметші кәсіби мерекелері қарсаңында арнайы төсбелгілермен және облыс әкімінің алғыс хаттарымен марапатталды. Салтанатты жиын барысында мемлекеттік қызметшілердің ел дамуы жолындағы рөлі ерекше атап өтілді, деп хабарлайды Altainews.kz тілшісі.

Аймақ басшысының айтуынша, бүгінде облыста шамамен 4 мың мемлекеттік қызметші жұмыс істейді. Олардың 70 пайызы – нәзік жандылар. Барлық атқарушы билік өкілдерінің бірлескен қажырлы еңбегінің арқасында Мемлекет басшысының тапсырмалары уақытылы орындалып, Үкімет белгілеген межелерге қол жеткізіліп келеді.

Салтанатты шарада «Мемлекеттік қызмет ардагері» төсбелгісімен облыс әкімінің аппаратының хаттама бөлімінің жетекшісі Жанат Турсиянова, Өскемен қалалық жұмыспен қамту және әлеуметтік бағдарламалар бөлімінің сектор меңгерушісі Нина Беляева, облыстық қаржы басқармасының бас маманы Жұлдыз Жартаева марапатталды.

Сонымен қатар «Үздік мемлекеттік қызметші» төсбелгісі және облыс әкімінің алғыс хаты бірқатар қызметкерлерге табысталды.

Тайыр Сапарғалиев
Фото: Махаббат Ахметжанова, Екатерина Сёмина
Видео: Руслан Акматалиев