Қыркүйектен бастап елімізде дәстүрлі «Учаске» жедел профилактикалық іс-шарасы басталды, деп хабарлайды Altainews.kz тілшісі.

Бұл шараның басты мақсаты – учаскелік инспекторлардың халықпен байланысын нығайту. Олар тұрғын үй секторларын аралап, құқықбұзушылықтың алдын алуға, қару иелерін және пробация қызметінде есепте тұрған адамдарды тексеруге бағытталған жұмыстар жүргізеді.

Полиция қызметкерлерінің айтуынша, ең басты назар әрбір аулада және әрбір үйде қауіпсіз әрі сенімді орта қалыптастыруға аударылады.

ЖПІШ аясында учаскелік инспекторлар үйлерді аралап, отбасыларға барып, тұрғындармен кездесіп, олардың мазалап жүрген мәселелерін шешуге көмектеспек.

Полиция азаматтарды аталған іс-шараға түсіністікпен қарап, қолдау көрсетуге шақырады, өйткені әрбір адамның қауіпсіздігі – баршамыздың ортақ міндеті.