«Қазгидромет» филиалы ақпараты бойынша бүгін, 5 желтоқсанда Шығыс Қазақстан облысының аумағында қар жауып, солтүстік пен шығыс өңірлерінде қар қалың түсуі ықтимал. Ауа райы құбылып, жаяу бұрқасын соғып, көктайғақ байқалады. Оңтүстіктен және оңтүстік-батыстан соққан желдің күші кей жерлерде 15-20 м/с-қа дейін жетеді, деп хабарлайды Altainews.kz.

Өскемен қаласында да таңертең және күндіз қалың қар жауып, бұрқасын күтіледі. Қала көшелерінде көктайғақ пайда болып, желдің екпіні 15-18 м/с-қа дейін күшейеді.

Осындай қолайсыз метеожағдайда ШҚО төтенше жағдайлар қызметі тұрғындарды сақтыққа шақырады:

• көлік жүргізгенде жылдамдықты асырып, қашықтықты қысқартпаңыз;

• көшеде жүргенде мұқият болып, асықпай қозғалыңыз;

• боран күшейген кезде елді мекеннен шықпай, жоспарланған сапарларды кейінге қалдырған жөн;

• төтенше жағдай туындаса, 112 нөміріне қоңырау шалу қажет.

Қауіпсіздік – әркімнің өз қолында. Ауа райы аяқасты құбылатын қыс мезгілінде сақтық шараларына мұқият болған абзал.