Шығыс Қазақстан облысында жастарды қолдау мәселелері әрдайым өзекті, себебі бұл санаттағы азаматтар аймақтың әлеуметтік-экономикалық дамуы үшін маңызды рөл атқарады. Бұл туралы облыстық әкімдікте өткен жиында ШҚО Ішкі саясат басқармасы басшысының міндетін атқарушы Рауан Жәмпейісов мәлімдеді, деп хабарлайды  Аltainews.kz тілшісі.

Облыс жастары түрлі бастамалар мен жобаларды жүзеге асыруға белсенді қатысатыны мәлім. Облыс халқының 24 пайызын 14 пен 35 жас аралығындағы жастар құрайды. Бұл шамамен 173 353 адам, олардың 31 581-і студенттер. Аймақ жастары «Таза Қазақстан», «Таза ойындар», «Экологиялық патруль» сияқты экологиялық акциялар мен жобаларға белсенді қатысуда. Сонымен қатар, өңірде еріктілер қызметі мен жастардың «ZHAS PROJECT» жобасы аясындағы аймақтық бастамаларды дамыту жақсы арнаға салынған.

Алайда, басқарма басшысының айтуынша, мемлекеттік жастар саясатын жүзеге асыруда бірқатар жүйелі проблемалар бар, оларды шұғыл шешу қажет.

Жиынды өткізген облыс әкімінің бірінші орынбасары Нұрымбет Сақтағанов жастарды қолдау – аймақтың болашағына салынатын инвестиция екенін атап өтті. Дәл қазір жас ұрпақ үшін қолайлы жағдай жасау бағытында белсенді шаралар қабылдау қажеттігін айтты. Ол жауапты органдарға жастарға арналған өңірлік тұрғын үй бағдарламасын әзірлеу мәселесін жақын арада қарауды тапсырды.